大埔宏福苑去年11月發生五級火災，多個家庭被無情火摧毀，死傷慘重，曾是宏福苑居民的謝安琪（Kay）對舊居火災感受至深，Kay亦因小學摯友的母親在火災罹難而感傷心。昨天（5日）是Kay入行21年，她在社交平台貼出和好友Lolo舊照，並撰長文分享多年來互相扶持的點滴，Kay有感而發表示：「時間真係唔等人。」又表示2026年是新開始：「我哋帶住勇氣帶住愛同埋所學習到嘅經驗，繼續努力做成就自己生命意義嘅事，我好愛你哋，多謝你哋一直咁愛我。」
Kay的Ig全文如下：「今（昨）日係我入行21周年嘅日子，由2026年1月1日叱咤開始，呢幾日不斷收到好多來自四方八面嘅祝福，其中一份愛，係嚟自我小學嘅死黨Phyllis LoLo。
由剛過去嘅11月26日到而家，佢經歷咗一段艱難嘅日子，面對佢媽媽羅太喺火災離世，我哋陪住佢一齊走過一同經歷，知道一切都好唔容易。
羅太係好堅強嘅人，作為單親媽媽，獨力養大兩個仔女，兄妹二人都長大成為好優秀、好有愛嘅人，佢喺我心目中好了不起，面對生活壓力仍一力擔當，永遠正能量滿滿，而且說話好幽默風趣，係一位超額完成嘅好媽媽，亦係我哋後輩眼中拼命為家庭奮鬥嘅英雄。
Lolo秉承咗羅太嘅堅強，係一位非常樂於分享正能量嘅事業女性，佢唔會對難關妥協，待人處事光明磊落不拖泥帶水，係我哋朋友之間嘅光，永遠一語中的道出我哋需要聽嘅說話，我常常為呢位老友感到自豪。
而佢就係鼓勵我開始寫「未來日記」嘅人，所以每朝早寫日記嘅時候，我都會諗起佢，亦會諗起佢有一位咁了不起嘅媽媽，呢個寫日記嘅習慣，幫我以最好嘅心情開展每一日，俾咗好大嘅力量我好好生活。所以我想趁今日呢個特別嘅日子，分享我同呢位好友之間嘅點滴。
過去呢個月，見佢每日為各樣安排勞碌奔波，喺心情極度悲痛嘅情況下，仍然沉穩咁處理各樣繁複嘅文件同程序，同埋同媽媽嘅告別，今（昨）朝佢同我講已經處理好所有事，仲提醒我哋要珍惜生命、珍惜時間，因為時間唔等人，我哋要把握每一分每一秒，好好活着好好愛着。
其實早兩個月之前，我答應過羅太，完成馬來西亞巡迴之後就返嚟同佢飲茶，可惜而家已經冇咁嘅機會，呢一個遺憾亦都令我更加明白，時間真係唔等人。
Lolo嘅說話同佢面對難關嘅態度，令我更加相信每個人活着都有自己嘅意義，無論幾艱難、幾多挑戰，我哋都要堅持，選擇做自己人生中最想做嘅事，選擇成為自己最想成為嘅人，活出生命最美好嘅意義。
我嘅摰友Lolo，讓我見證到佢對生命嘅熱愛，佢將對佢媽媽嘅愛同思念，好好安放喺心裏，同時亦記住媽媽嘅說話，努力回到生活軌道，喺佢最難過嘅呢段日子，佢帶住傷痛迎難而上，令我深刻咁感受到、體驗到，佢對媽媽嘅尊敬，同對生命最大嘅熱愛。
好想同大家分享呢份真切嘅力量，因為我相信人與人之間就係咁奇妙，我哋嘅故事雖然各有不同，但係情感卻係互通，如果有緣睇到呢段文字，希望你都可以感受到，每個人嘅生命，都有唔同嘅意義、唔同嘅節奏﹑唔同嘅溫度、寬度、深度同態度，所以我哋更加應該珍惜大家嘅唔同，多啲包容，多啲理解，多啲關心，願呢個分享，可以為需要力量嘅朋友，帶嚟一點鼓勵、一份溫柔同一個擁抱。
當中有一個小巧合亦都好觸動我嘅心，羅太本名叫「老英」，人如其名，佢係我心目中一位英雄，我小學時第一次聽到auntie個名，立即聯想到天空中有威嚴又自信嘅老鷹，自由自在任意飛翔好不威風，而家每當見到天空有鷹飛過，我就會想起兩個熟悉嘅名字，兩個不斷帶俾我力量嘅人，好似佢哋又飛過嚟探我、鼓勵我、陪伴我一樣。
喺入行21周年呢個日子，我衷心祝願我好朋友Lolo，佢哥哥同埋佢哋其他家人，祝願我嘅家人、朋友﹑我嘅團隊同埋愛我嘅所有人，將需要放下嘅，留喺2025年呢一個特別嘅位置好好安放，2026年係一個新嘅開始，我哋帶住勇氣帶住愛同埋所學習到嘅經驗，繼續努力做成就自己生命意義嘅事，我好愛你哋，多謝你哋一直咁愛我。」
