【明報專訊】今屆立法會任期仲有幾日就結束，立法會議員狄志遠落任後，新思維喺立法會議席「清零」。新思維把握最後呢幾日任期，噚日喺立法會開記者會，就下年度財政預算案提交建議書，並提出將大埔宏福苑五級火事件，列為部門首長責任制嘅首個「試點個案」，落實真正嘅「問責到人」。
狄志遠話，香港嘅競爭力不止於高樓大廈或金融數據，更在於引以為傲嘅「香港標準」，但宏福苑大火揭露咗樓宇安全監管流於形式、物料驗證制度形同虛設等。佢認為市民需要嘅唔單止係一份財政預算，而係政府重振「香港標準」嘅承諾，政府必須重建開放決策，決策要經得起專業和民心嘅考驗，話咁先能夠係「由治及興」。
就宏福苑大火事件，新思維副主席黃俊瑯建議成立「緊急情况專項基金」，話資金來源可由地租、差餉及賣地收入中抽取固定比例，由副司長負責統籌。佢又要求全面公開宏福苑捐款嘅收入及支出細項，並引入外部第三方審計。
無諗住解散 繼續做倡議
新一屆立法會再無新思維嘅代表，但黃俊瑯話佢哋絕對無解散嘅想法，成員仲有股熱誠，希望能做多啲事，又話就算無議席都可同社會連結，未來會繼續做政策倡議及社區參與，又可與其他人成立非牟利組織。
發表評論