【明報專訊】聖誕節將至，天主教香港教區秘書長辦公處噚日發通告，提到港人因大埔宏福苑火災而仍處於悲痛之中，咁仲應唔應該慶祝聖誕呢？教區就話，其實仍可懷住喜樂同希望慶祝聖誕，今年周守仁樞機邀請教友以更溫暖、更充滿鼓勵與喜樂嘅方式迎接基督誕生之日，建議今年聖誕活動以簡樸為主，可加入一啲輕鬆愉快嘅元素，例如溫馨報佳音、分享喜樂故事、祈禱追念亡者，之後加入「希望時刻」，一齊分享感恩同支持，畀大家再次學會微笑。
籲改送「喜樂小禮」分享愛
周守仁樞機鼓勵教友將小部分用嚟買禮物嘅錢化成愛嘅分享，鼓勵大家改送「喜樂小禮」，例如手繪卡、自製小糕點、暖心字句等。另外，心意卡建議唔止寫上代禱，亦可以寫上祝福、感恩同喜悅，將聖誕樹打造成「喜樂心意樹」；堂區嘅聚會空間建議加入柔和燈飾及聖誕音樂，營造既溫暖又令人舒心嘅陪伴氛圍；彌撒中嘅代禱後可加入激勵嘅感恩祈禱，感謝每一份互助與愛。
通告話聖誕節慶祝人類嘅救主基督降生成人，當宏福苑災民正踏上療癒同重建家園嘅路途之際，聖誕節正好提醒大家，無論環境順逆，天主常與我們同在，「聖誕的喜訊為我們帶來力量，希望與重新微笑的勇氣」。
發表評論