【明報專訊】政府噚日公布新一輪官員任命，今日起原擔任食環署助理署長（街市發展）嘅鍾慧婷（圖），會接替陳巧敏任大埔民政事務專員（DO）。陳巧敏早前出席大埔宏福苑火災殉職消防員何偉豪路祭儀式時，身穿黑白花紋連身裙引起爭議，陳其後道歉。據Emily了解，鍾陳兩人係對調崗位，屬正常職位調動。
陳巧敏2018年10月起上任大埔民政專員至今超過7年，兼任大埔區議會主席；佢對上任職嘅崗位係教育局助理秘書長。陳喺2001年加入政務職系，曾於多個政策局及部門工作。
民青局常秘調公務員局 李百全接任
另外，喺下周至下月初亦有5項高層官員調動。下星期一（19日）起現任民政及青年事務局常任秘書長林雪麗，將轉任公務員事務局常任秘書長，接替同日展開退休前休假嘅梁卓文；現任保安局常任秘書長李百全將轉任民青局常任秘書長。
2月5號起，助理政府化驗師張子俊將會出任政府化驗師，接替同日展開退休前休假嘅李偉安。到下月9號，駐京辦副主任阮慧賢將出任律政司政務專員，接替已展開退休前休假嘅王學玲；發展局副秘書長（工務）林雅雯會接替陳潔玲，出任粵港澳大灣區發展專員。
發表評論